Samschtig
Am Morge sind es paar us em Bett gheit. Aber es sin alli rächtzytig cho. Uf em Wäg uf Arboldswil het dr Tom diä ganz Zyt im Auto so es Angschtgfühl gha, dass är sZunzge es paar Chinder het lo stoh. Aber zum Glück het sich nachher, wo mir dobe gsi sind bestätigt, dass alli dobe sin. Chum acho, hei mir numme schnäll d'Sache in dUnterkunft to und schnäll umzoge und denn isch es scho ab in dHalle gange. Mir hei eus e chli mit spiele beschäftigt. Gli hets scho mol di erschte hungrige Büüch geh, aber au für das hei mir gsorgt. Will im Tom sis Mami und Papi z Arboldswil wohne, hei mir zum Lotti dörfe goh Spagetti ässe. Natürlich sind sie wie immer guet gsie. sLotti chocht eifacht perfekt!! Für sDessert hei dEltere zum Teil gsorgt. Am Nomittag isch mit Grät- und Bodeturne witer gange. Bim Tom hei sie Barreturne gmacht und bim Roman und Martin Bodeturne. Die Chleine hei meh e chli gspielt mit em Barre, aber si händ dr Plausch gha und das isch jo dHauptsach. Und gli isch wieder fünfi gsi, denn hets gheisse, ab go Sache in dr Unterkunft hole und unter dDuschi stoh. In dere Zyt isch dr Roman afang go afüüre im Wald für uns, dass mir nachher numme no hei chönne dWürscht drüber hebe. Bi däm Plätzli wo mir usgsuecht hei, händ Chind chönne im Wald ummetobe, uf dr Wiese mit em Ball spiele oder dr Roman bim telefoniere störe. Und denn isch halt au scho wieder Zyt gsie zum heime goh. Mir sind gmüetlich heime glofe und bim Lotti go Dessert ässe, Vanille- Schoggicreme und Chueche. Und gli isch scho wieder Zyt gsi für in dFädere. Es isch lang gange bis sie ruehig gsie sind. So und das wär euse ganze Tag gsie. Mir Danke am Kurt und am Lotti dass mir hei dörfe zu ihne Hei goh ässe. Merci viel viel mol, es isch guet gsi!!

Sunntig
Am Morge sind scho diä Erschte öpe am halb siebni verwache, was jo doch Dähei normalerwiis am e ne Sunntig ussergwöhnlich isch. Am viertel vor achti hei di Meischte gmeint dr Tom und dr Roman heige sich verschlofe, wills nämlich am achti zMorge set geh bim Lotti und Kurt. Scho nach churzer Zyt chunnt das Riisebaby (dr Tom) ine ztrampe zum Tagwach mache. Mir hei eus agleit und sind go zMörgele. Es het Chäs, Schinke, Zopf, Birchermüesli und Milch geh. Es het paar geh wo nüt gässe händ. Komisch, jo kei Wunder, wenn me die ganz Gschicht vo dere Nacht weiss. Es paar händ die ganz Nacht Gummibärli gässe. Wiies jo so schön heisst: Haribo macht Chinder froh.....! Aber i glaub das het am Lotti nid so Freud gmacht, dass sie nüt gässe händ. Denn nach em zMorge gots frisch und munter in dHalle. Mir hei e chli Lichtathletik gmacht. Und denn isch öper cho! Stellet euch vor, wow megga geil, Bsuech vom Juniore Trainer vo GC. D Chinder hei e Freud gha an ihm. Är het Tricks chönne vom Ronaldo und süscht no vo söttige Superstars. Alli hei ihres Beschte ge und probiert snochemache. Mir wei au ihm ganz härzlich Dankschön säge, dass är Zyt gfunde het, zu eus zcho. Är stammt übrigens au us dr Familie Weber, so wie dr Tom. Vo däm huffe Bewundere und Lehre hets rysig Hunger geh. Was natürlich nie dörf fehle bi mene Chinder-Ässe sind Schnitzel und Pomme Frits. Do händ alli gärn zuegschlage, mängisch sogar zwoi- drümol, di Erwachsene au. ZMittag händ alli gässe. Das het sLotti und dr Kurt gfreut. Am Nomittag isch eigentlich nümme viel Zyt gsi zum Spiele. Mir händ packt, ufgrumt und no schnäll ab unter Duschi, drmit dMamis und dPapis Freud hei, wenn mir früsch putzt und gschtrält heichömme. Nach em Dusche hei mir no es paar Dankschön Sätzli gmacht für sLotti und dr Kurt. Aber wo sies hätte müesste ufsäge, het sich keine getraut und kein hets chönne. Also wär blibt denn do no anders übrig als dr Martin, wo halt ufpasst het, wos ums Üebe gange isch. Dr Satz het gheisse: "Liebs Lotti und liebe Kurt, mir danke euch für das guete feine Ässe, wo mir hei dörfe bi euch gniesse und dass mir bi euch ii und us hei dörfe. Merci viel mol Lotti und Kurt." Das isch jo nid schwer, dä Satz zmerke oder?! Halt mit e bitz Verspötig sind mir abgfahre Richtig Zunzge. So, das wärs denn au scho gsie, euses Jugiweekend. Schad, dass es scho wieder verbi isch, aber es isch alles e mol einisch sÄnd. I möcht an minere Stell do nomol allne danke säge. Merci Lotti und Kurt fürs Ässe, merci Tom und Roman für das lässige Weekend fürs Vorbereite und Durefüehre, merci am Tom si Brueder, won i nüm weiss wie är heisst sorry, merci allne Eltere für diä feine Chüeche und merci dä Andere, wo au no mitgwürkt händ, do bin i glaub au eine drvo.
MERCI